'అలీఫ్ బే తే'

పూల రెమ్మల్ని పోగేసి ...
పరీలు నాజూకు వేళ్లతో
కాశ్మీరీ ఎంబ్రాయిడరీ ఏదో చేసినట్లు ...
లిపి అల్లికల్లో దూరి నా మనసు వెనక్కు రానంటుంది

నెలవంకల్ని కుప్పేసి
'అలీఫ్ బే తే' ల్ని సృష్టించినట్లు
వెన్నెల సోనలేవో నన్ను
అవ్యక్త పరిమళాల్లోకి లాక్కుపోతాయి

నాజూకు పరీలంతా చేతుల్లో
చేయేసుకుని వనవిహారంలో మునివేళ్లపై
నాట్యం చేస్తున్నట్లు
అక్షరాలు నన్ను కవ్విస్తూ పిలుస్తూ ఉంటాయి

అడవిలో తప్పిపోయిన మనసుకు
సేదతీర్చే శయ్యల్లా
చూడగానే దేహమూ హృదయమూ విప్పారుతాయి

కానైతే పల్లెల్లో
మూలమూలా వెదికినా దొరకదు నా భాష
ఏ సర్కారీ బడిని తట్టి చూసినా నాలుగు ఉర్దూ అక్షరాలు
ఎక్కడా కళ్లని స్పర్శించడంలేదు
నాది కాని భాష ఇవాళ నన్ను ఏలుతున్నది
నా ఇంటిని నా నాలుకను ఆక్రమించింది
నా భాషకు నాకు
కాంతి సంవత్సరాల దూరాల అగాధాలను సృష్టించింది!

ప్రాణప్రాయంలో ఉన్న నా భాషకు
మంచినీళ్లు పోసి బతికించాలని మాత్రం
ఎవరూ చూడ్డం లేదు ...!
ఎవరికీ అనిపించడం లేదు!
ఉర్దూ లాంగ్వేజ్ -మేడ్ ఇన్ ఇండియా!
అంతరించిపోతున్న వాటిల్లో
నా భాషకూడా ... మ్యూజియంలో ...!
ఇప్పుడు అమాంతం చిన్నపిల్లనై
'అలీఫ్ బే తే' లు నేర్చుకోవాలని
మనసు మారాం చేస్తున్నది ...!